ტრადიციულად, მაისის პირველ ორშაბათს, მოდისა და პოპ-კულტურის ცნობილი სახეები ნიუ-იორკის მეტროპოლიტენის მუზეუმში შეიკრიბდნენ. “მეტ გალამ” წელსაც ჩვეული ხმაურით ჩაიარა.
Met Gala-ს ღონისძიებით, მეტროპოლიტენის მუზეუმის სპეციალური განყოფილების, კოსტიუმების ინსტიტუტის ყოველწლიური გამოფენა იხსნება. წლევანდელი თემაა – Superfine: Tailoring Black Style – მე-18 საუკუნიდან მოყოლებული, შავკანიანთა სტილის ევოლუცია, კულტურული და ისტორიული მნიშვნელობა დენდიზმის კონტექსტში. Vogue განმარტავს: ““Black dandyism” – შავკანიან მამაკაცთა ჩაცმის სტილი, მათთვის დამახასიათებელი მანერები და ქცევის ნორმები, რაც მე-18 საუკუნიდან, აფრიკული და ევროპული სტილისა და ტრადიციების გადაკვეთით ჩამოყალიბდა.”
ახლახან, ამერიკულმა პრესამ დაადასტურა, რომ 2025 წლის Met Gala, ღონისძიების ისტორიაში, ყველაზე შემოსავლიანი იყო – რეკორდული 31 მილიონი დოლარი შეგროვდა.
როგორც ჩვენი მკითხველისთვის ცნობილია, Met Gala ნიუ-იორკის მეტროპოლიტენის ხელოვნების მუზეუმში, კოსტიუმების განყოფილების ფონდის მხარდასაჭერად შეიქმნა. ეს არის საქველმოქმედო ღონისძიება, რომელმაც სანახაობრივი გალა წვეულების სახე 1970-იან წლებიდან მიიღო. დროთა განმავლობაში, იზრდებოდა “მეტ გალას” მასშტაბები და იერსახე, თუმცა მისი, როგორც საქველმოქმედო წვეულების, მიზანი არ შეცვლილა.
2025 წლის Met Gala -ს ორგანიზატორები იყვნენ: ანა ვინტური, ლუის ჰამილტონი, ეისაპ როკი, ფარელ უილიამსი, კოლმან დომინგო და ლებრონ ჯეიმსი. ლებრონ ჯეიმსი, ჯანმრთელობის მდგომარეობის გამო, ღონისძიებას ვერ დაესწრო.
